Molekgotlaphethiši wa kgoro ya maphelo mo Limpopo, Mme Dieketseng Mashego, o thakgotše leanophethagatšo la Mmušo wa probense la go bitšwa Limpopo Provincial Government Youth HIV. Leanophethagatšo le le hlomilwe ka Labohlano wa 06 September, ka tlase ga tabataba ye ‘Zikhala Kanjani’, mo holong ya setšhaba ya Seleka. Morero mogolo wa lenaneo le, ke go tsebiša ka go kaonafala le phihlelelo ya ditirelo tša go lwantšha twatši ya HIV le mekgwa ya go thuša baswa go atlega kgahlanong le ditlhotlo ge ba nyakana le ditsela tša go thibela bolwetši.
Molekgotlaphethiši o be a farafarilwe ke baetapele ba go fapana, go swana le Ramotse wa Masepala wa Selegae wa Lephalale, Aron Mokgetle, yo a boletšeng ka bohlokwa bja lesolo le, ka ge masepala o ikemišeditše go tiiša ntwa kgahlanong le go ima ga baswa ba mahlalagading, phetelo ya HIV/AIDS le malwetšwe a mangwe a thobalano. O tlaleleditše ka gore tlhabollo ya leanophethagatšo le e tla lemoša ba lefapha ka ditiragalo tša go šitiša ntwa kgahlano le HIV/AIDS, kamego ya setšhaba le go hwetšagala ga di dirišwa.
Molekgotlaphethiši o boletše gore leanophethagatšo le ke phihlelelo ye kgolo leetong la go lwantšha phetelo ya twatši ya HIV go baswa.
“Leanophethagatšo la go thibela phetetšo ya twatši ya HIV go baswa, la go bitšwa (Zikhalakanjani Youth HIV Prevention) ke sebetša sa bohlokwa sa go fokotša hloba-boroko tše re kopanang le tšona. Kgopolo ye e tlile ka baswa bao ba ratago go thuša baswa ka bona, go lwantšha dihlohlo tšeo re kopanang le tšona ntweng kgahlanong le HIV. Lenaneo le le tla matlafatša maitapišo a rena a go ruta baswa ka twatši ya HIV le di tsela tša go itšhireletša tša go swana le go šomiša dikgotlopo, PrEP (Pre-exposure Prophylaxis) le mehuta ya go dira diteko tša HIV”, a realo.
Mashego o tšwetše pele ka gore ge setšhaba se e ba le tsebo se ba le maatla, gomme mmušo o fa baswa tshedimošo gore ba kgone go tšea diphetho tša maleba go lota maphelo a bona. Ka morago ga leanophethagatšo le, masepala wa Lephalale o tšwetše pele ka lesolo la go lemoša setšhaba ka HIV/AIDS lepatlelong la Nikara kua Mokuruanyane ka la 18 Setemere. Masepala o re lesolo le le tla ka morago ga gore Lekgotla la go lebelela HIV/AIDS Seleteng sa Waterberg kgorong ya maphelo le lemoše ka palo ya go namelela ya phetelo ya twatši ya HIV mo Lephalale.
Go ya ka dipalopalo, maokelo a mafelo a; Mokuruanyane, Seleka, Shongoane, Lephalale le Marapong a na le palo ya go feta 13 403 ya batho ba bagolo ba go tshwaetšwa ka twatši ya HIV mola bana ba 310 ba tshwaeditšwe ka twatši ye. Setšhaba se fahlošitšwe ka tša maphelo, malwetši a monagano, bolwetši bja mafahla, malwetši a go fetela ka tša thobalano ya go se bolokege, diteko tša HIV/AIDS, thibela pelegi le tirišo ya diritifatše. Baithuti ba dikolo tše pedi elego Majadibodu le Mokonenkwenoko ba thabetše thuto yeo ba e humanego tšatšing leo. Go ya ka tshedimošo ya kgoro ya maphelo, basetsana ba lesometee (11) ba mengwaga ya magareng ga lesome (10) go fihla go lesome tshela (16) ba imišitšwe.
Dipalopalo tša tikologo ya Lephalale mo tshwaetšo e lego godimo a ka tsela ye:
- Mokuruanyane: Bao ba humanago mereyana ya ARV ke ba 2,282 mola bana ba go phela ka twatši ye e le ba 76.
- Shongoane: Bao ba humanago mereyana ya ARV ke ba 2,363 mola bana ba go phela ka twatši ye e le ba 68.
- Marapong: Bao ba humanago mereyana ya ARV ke ba 2,475 mola bana ba go phela ka twatši ye e le ba 48.
- Lephalale: Bao ba humanago mereyana ya ARV ke ba 2,823 mola bana ba go phela ka twatši ye e le ba 22.
- Seleka: Bao ba humanago mereyana ya ARV ke ba 3,460, mola bana ba go phela ka twatši ye e le ba 96.